Knowless nawe agiye gukorera igitaramo i burayi

Umuhanzi Jeanne D’Arc Butera Ingabire uzwi nka Knowless mu kwezi kwa karindwi azerekeza mu gihugu cy’Ububiligi aho azaba ajyanywe no gukora ibitaramo ku butumire bw’abanyarwanda baba muri iki gihugu.

Mu kiganiro Salus relax cyo kuri iki cyumweru Knowless yatangaje ko azaririmbira abanyarwanda bo muri Diaspora ku butumire bw’itsinda ryitwa Exotic Nice. Iri tsinda ubusanzwe ngo rikaba ritegura ibitaramo ritumiramo abahanzi batndukanye bajya ku mugabane w’uburayi kuririmbira abanyarwanda bo muri Diaspora. Knowless akaba yavuze ko afite umu “manager” muri iri tsinda witwa Abdul Kitoko, ngo bikaba ari muri uru rwego yanatumiwe kuririmba muri iki gitaramo.

Uretse kuba azaririmba mu gihugu cy’ububirlgi, Knowless ngo arateganya no kuzaririmba mu gihugu cy’ubufaransa. Gusa yirinze gutangaza umunsi cyangwa ukwezi byazabera nk’uko yabivuze agira ati: “Usibye mu bubiligi, hari ubundi butumire uretse ko ntaramenya umunsi cyangwa ukwezi. Hari abantu bifuje kuntumira, ariko nyine twari tutarabishyira mu bikorwa;bigiye mu bikorwa nshobora kuva mu Bubiligi nerekeza no mu Bufaransa”.

Knowless akaba avuga ko kuba yaratumiwe kuririmba ku mugabane w’uburayi bigaragaza ko ibihangano bye bikunzwe.

Ati: “Ibintu byose ni amahirwe, ibyo ari byose kugira ngo bantumire ni uko ibihangano byange byari byabagezeho bakambwira yuko nahagera nkabaririmbira”.

Knowless agiye kuririmba abanyarwanda bo muri Diaspora nyuma ya Miss Jojo nawe mu minsi ishize wari watumiwe kuririmbira aba banyarwanda.